Xavier Deltell, Carmen Alcayde, Oswaldo Digón e Quico Cadaval forman parte do cartel do festival
O Concello renova a súa aposta por ofrecer espectáculos cómicos de alta calidade na oitava edición do Festival de Humor. Trátase dun programa xa consolidado como un dos grandes referentes nas propostas culturais municipais da primavera. E regresa despois da pausa de dous anos motivada pola pandemia.
Nesta edición volverase contar cun cartel de luxo. Como en ocasións anteriores, estamos ante un festival moi completo, con shows de calidade incuestionable e variados para achegarse a todos os públicos. As entradas sairán á venda mañá, martes 26 de abril, e poderanse adquirir no Concello ao prezo reducido de 5 euros por cada espectáculo.
Calendario de presentacións
- Oswaldo Digón, un dos cómicos galegos de referencia no panorama actual, abrirá o cartel o venres 6 de maio con Outra movida, unha recompilación de contos baseados na súa propia vida.
- O venres 13 será a quenda para Xavier Deltell. O actor catalán, coñecido polas súas intervencións en programas como Crónicas Marcianas, Mira quién baila e La que se avecina, trae por primeira o seu monólogo-show interactivo musical Dando la nota.
- A cita do venres 20 será con Quico Cadaval. Considerado mestre de todos os contadores de historias galegos. O cómico ribeirense deleitará ao público presente co seu peculiar xeito de entender a vida e contar as cousas que suceden ao seu arredor.
- O festival pecharase o venres 27 con Carmen Alcayde. A polifacética xornalista, presentadora e escritora valenciana presentará por primeira vez en Galicia Menuda Pájara, un monólogo no que fala sen pudor das etapas que marcaron a súa vida.
