A iniciativa máis novidosa para conmemorar as Letras Galegas será o concurso de marcapáxinas
O 17 de maio celebrarase o Día das Letras Galegas. Este ano, vai dedicado a homenaxear a figura da lucense Xela Arias. En torno a esa data, o Concello desenvolverá unha programación municipal dirixida ao público infantil e familiar.
A iniciativa máis novidosa será o concurso de marcapáxinas. Se convida a participar a todos os nenos de idades comprendidas entre os seis e os doce anos. As elaboracións deben ser dun tamaño de vinte centímetros de alto e seis centímetros de ancho e, preferentemente, feitas en cartolina. Poden presentarse ata o 14 de maio en calquera das bibliotecas municipais da Laracha, Paiosaco e Caión.
Están establecidas dúas categorías de premios. A primeira para o alumnado de 1º, 2º e 3º de primaria, e a segunda, para os de 4º, 5º e 6º de primaria. En cada categoría haberá dous premios compostos por lotes de libros ou material didáctico e educativo adaptado por idade. Ademais, os dous traballos de cada categoría mellor valorados polo xurado serán editados polo Concello e distribuídos como os marcapáxinas oficiais da rede de bibliotecas municipais. Ver debaixo o programa completo e bases do concurso.
Espectáculos infantís
Pola súa parte, os espectáculos infantís tamén terán unha ampla presenza no programa municipal das Letras Galegas:
- Venres 14 de maio: no CEIP de Caión a partir das 17:00 horas con Xeliña fala galego. Trátase dun contacontos a cargo de Caxoto e dirixido a nenos a partir dos seis anos de idade.
- Domingo 16 de maio desde as 12:00 horas no baixo da biblioteca municipal da Laracha: ofrécese o contacontos para bebés (desde os seis meses e ata os catro anos) Brilla brilla, de Trémola Teatro.
- Luns 17 de maio: a Casa da Cultura acollerá a partir das 18:00 horas a peza teatral Rosalía de Culturactiva e centrada na infancia da poeta. Vai dirixida ao público infantil e familiar.
- Martes 18 de maio pola tarde, desde as 17:30 horas: obradoiro de narración oral para nenos de 3 a 12 anos de idade a cargo de Carmen Conde.
En todos os eventos as condicións de acceso estarán suxeitas ás medidas sanitarias e sociais que establezan ao respecto as autoridades sanitarias.
