Trátase de xornadas de tecnificación avanzadas, adestramentos para todas as categorías e o campus anual do Club Baloncesto Laracha
Ao longo deste verán A Laracha acollerá tres campus de baloncesto de diferentes características. Se desenvolverán en instalacións municipais e para os que a inscrición xa está aberta. As tres iniciativas, que contan co apoio do Concello, foron presentadas na Casa Consistorial polos seus promotores. Participaron o alcalde, José Manuel López Varela, a edil responsable da área de Deportes, Patricia Bello, o presidente e o secretario do Club Baloncesto Laracha, Eliseo Velo e Jesús Cabado, Pía Furelos en representación de Tiro Libre e Javier Cotelo como membro de +Talento.
A primeira das iniciativas é o organizada por +Talento. Trátase de xornadas de tecnificación avanzadas dirixidas a maiores de doce anos de idade. Os participantes poderán mellorar as súas capacidades neste deporte con tres sesións de seis horas de duración cada unha. A metodoloxía destaca pola súa personalización ao ter un número reducido de participantes e amplo de adestradores.
Así, para a primeira fin de semana (do 10 ao 12 de xullo) xa están todas as prazas completas. Aínda hai dispoñibles nas xornadas da fin de semana do 17 ao 19 de xullo. As inscricións poden realizarse na web www.mastalentobaloncesto.com.
Días e horarios
Por outra parte, na semana do 13 ao 17 de xullo a entidade Tiro Libre –tenda de baloncesto e organizadora de eventos- propón adestramentos específicos para persoas de todas as idades. Desde categoría mini ata sénior, a desenvolver no pavillón Municipal da Laracha. As xornadas, a realizar en horario de mañá, incluirán preparación física e técnica individual co emprego dunha máquina de tiro. Pódese ampliar información e inscribirse en www.tirolibresantigo.com/workout. Os organizadores contemplan descontos para xogadores do C.B. Laracha.
A última das iniciativas é a terceira edición do campus que organiza o Club Baloncesto Laracha. Está dirixido a rapaces de entre 6 e 15 anos de idade e se vai realizar no pavillón do IES Agra de Leborís entre o 3 e o 7 de agosto de 10:30 a 12:30 horas. O campus estará a cargo dos adestradores Basilio Pampín, Sito Cabado, Irene Velo, Roi Vega e Javi Cotelo. Hay vinte e catro prazas dispoñibles. A inscrición xa está aberta e debe realizarse contactando co club.
Os organizadores destes tres eventos incidiron en que durante a actividade serán cumpridas escrupulosamente todas as medidas de seguridade sanitarias. O alcalde, José Manuel López Varela, agradeceu estas iniciativas que ofrecen á cidadanía larachesa durante o verán. Por iso afirmou que as entidades organizadoras deste tipo de eventos poden contar co apoio do Concello da Laracha.
