A campaña comenzou en Paiosaco e Caión onde repartíronse funís para facilitar o depósito en botellas de plástico
O stand informativo da campaña que está a desenvolver o Concello da Laracha ten o obxetivo de potenciar o reciclado de aceites domésticos. Días pasados estivo na praza Eduardo Vila Fano de Caión. Entre as 10:30 e as 13:30 horas repartíronse funís de xeito gratuíto para facilitar a separación do aceite de cociña para o seu posterior tratamento. Ademais, aproveitouse a campaña para continuar informando sobre o programa Ti tes a chave sobre o uso dos contedores marróns da quinta fracción de orgánicos. O alcalde, José Manuel López Varela, e a concelleira Rocío López acudiron ao stand para interesarse polo desenvolvemento desta iniciativa.
Nas últimas semanas este mesmo stand xa estivera no campo da feira de Paiosaco e na Praza do Concello. O mércores da semana que vén, no mesmo horario, regresará á vila da Laracha para situarse no entorno do centro de saúde.
Colectores laranxas
No desenvolvemento desta campaña o Concello conta coa colaboración da Consellería de Medio Ambiente, Territorio e Vivenda e do Ministerio de Transición Ecolóxica. Esta acción informativa lévase a cabo despois de poñer a disposición da cidadanía un total de doce colectores laranxas para o depósito de aceite doméstico. Foron instalados en puntos estratéxicos das vilas da Laracha:
- Avenida Fisterra
- rúas Río Acheiro
- Lino Gómez Canedo
- Santa Lucía
- Rosalía de Castro
- Luis Martínez Vázquez
- Epifanio Campo xunto ao centro médico
- estrada AC-552 á altura das Torres de Cillobre
- Paiosaco (campo da feira)
- Caión (Avenida da Laracha e rúa Campo da Insua)
- urbanización Monte Claro no Cancelo do Medio (parroquia de Cabovilaño)
O obxectivo desta iniciativa é facilitar a cidadanía un modo ecolóxico de desfacerse do aceite vexetal de cociña unha vez usado, xa que se trata dun material especialmente contaminante para a auga, que dificulta en gran medida o proceso de depuración e que, por tanto, non debe botarse polos desaugadoiros da cocina nin polos inodoros para evitar que cheguen á rede de sumidoiros. O aceite debe depositarse nos contedores en botellas de plástico ben pechadas.
