A iniciativa beneficiará aos veciños residentes na zona da avenida e aos establecementos comerciais e hostaleiros
O Concello vén de iniciar os traballos dirixidos a crear un novo aparcamento público e gratuíto de vehículos na Avenida Bos Aires da Laracha. Sitúase xunto á rúa Santa Lucía e preto do centro médico da capital municipal nunha parcela que presenta unha superficie de 1.783 metros cadrados. A mesma, foi arrendada polo Concello a través do concurso público no que se convidou a presentarse aos propietarios de solares situados en puntos estratéxicos do termo municipal.
Con esta iniciativa aumentaranse as prazas de estacionamento público e gratuíto de vehículos nesa zona do núcleo urbano da Laracha. Beneficia tanto aos veciños residentes nas inmediacións como aos establecementos comerciais e hostaleiros da zona e aos usuarios do propio centro médico da Laracha. Ademais, tamén funcionará como aparcamento disuasorio para os vehículos procedentes da parroquia de Vilaño e da estrada A Laracha-A Silva considerando a súa proximidade co centro da vila.
Recentemente o Concello estableceu a zona azul gratuíta nas rúas Santa Lucía, Epifanio Campo e Suíza, situadas a carón da Avenida Bos Aires. É para favorecer a rotación dos vehículos de luns a venres durante as mañás no entorno do centro médico. O novo espazo de estacionamento tamén ofrecerá unha alternativa a esa circunstancia ao non presentar limitacións temporais para o aparcamento.
