O parque de patinaxe supón un investimento de 155.000 euros a financiar con fondos municipais
As obras de construción do parque de patinaxe Skatepark que o Concello da Laracha está a crear na parte traseira do IES Agra de Leborís avanzan a bo ritmo. A primeira fase, consistente no movemento de terras e canalizacións soterradas, están practicamente rematadas. Ao longo dos próximos días os traballos centraranse na cimentación e formigonado.
O Skatepark disporá de diferentes tipos de planos inclinados e costas para ofrecer un amplo abano de posibilidades de movementos. Contará, ademais, cunha fonte de auga potable e iluminación en báculos e proxectores simétricos LED.
Neste ambicioso proxecto o Concello inviste 155.000 euros procedentes integramente de fondos propios municipais. Promóvese coa finalidade de ofrecer unha nova opción para potenciar os estilos de vida saudables especialmente entre o público adolescente e xuvenil. Ademais do parque de patinaxe, xa están dispoñibles dúas pistas polideportivas e tamén será construído un circuíto de calistenia.
