Na comisión municipal de seguimento da situación epidemiolóxica tamén se tratou o protocolo para a reapertura da hostalería
A comisión do seguimento da situación epidemiolóxica na Laracha reuniuse onte tras analizar as publicacións no Diario Oficial de Galicia (DOG) sobre as novas medidas restritivas. En materia deportiva, acordouse a reapertura, a partir do luns, do complexo da piscina municipal da Laracha. A decisión tomouse tamén de acordo coa empresa concesionaria da xestión das instalacións, Hebe Sport. Neste fin de semana realizará os traballos de posta a punto oportunos.Tanto na piscina como no spa e nas zonas de ximnasio e de fitness deberase respectar o aforo máximo do trinta por cento da capacidade.
Ademais, desde onte volven estar dispoñibles para o seu uso as pistas de pádel situadas no complexo deportivo do campo de fútbol Municipal da Laracha. Tamén está previsto reabrir todas as pistas polideportivas descubertas do termo municipal.
Locais de hostelería
Outro dos asuntos centrais da comisión foi analizar os protocolos establecidos pola Xunta de Galicia para a reapertura dos locais de hostalería. Na Laracha permítese soamente o consumo en terraza. Cunha ocupación máxima do cincuenta por cento e ata as 18:00 horas. Dita normativa obriga aos establecementos hostaleiros a indicar nun lugar visible o aforo máximo. É conveniente empregar un sistema de códigos QR vinculado a PassCovid da Xunta para que os clientes poidan rexistrar a súa visita. Outra cuestión recollida no protocolo é o control do cumprimento das medidas por parte da Policía Local, establecendo un mínimo dunha inspección semanal de cada local.
