O estacionamento na zona azul limítase a 90 minutos para favorecer a rotación dos vehículos
Nos espazos de aparcamento das rúas máis céntricas e transitadas do núcleo urbano da Laracha está establecida a zona azul gratuíta. Trátase dun sistema que limita o aparcamento a hora e media durante as mañás de luns a venres. A finalidade é favorecer a rotación dos vehículos.
O Concello da Laracha está a ampliar este espazos no entorno do centro de saúde e punto de atención continuada para facilitar o estacionamento aos usuarios. Trátase de trinta e cinco novas prazas de aparcamento públicas situadas nunha das marxes das rúas Santa Lucía e Suíza e tamén nun sector da rúa Epifanio Campo. Os traballos completaranse coa instalación da sinalización vertical informativa.
A zona azul da Laracha está en vigor de luns a venres (excepto festivos) exclusivamente en horario de mañá, de 9:00 a 15:30 horas. Permite o estacionamento de xeito gratuíto, pero limitado a un tempo de noventa minutos. Cada condutor debe colocar nun lugar visible do vehículo calquera medio que permita comprobar a hora de chegada.
A ordenanza municipal sobre tráfico, circulación de vehículos a motor e seguridade viaria establece que están exentos das limitacións os automóbiles particulares que dispoñan da tarxeta de mobilidade reducida. Pero tamén, os vehículos con licenza municipal para actividades específicas, de entidades públicas adscritos á defensa e á seguridade cidadá. É, por suposto, emerxencia e ambulancias.
