A programación municipal do Día das Letras Galegas desenvolverase entre o 15 e o 19 de maio
O 17 de maio celebrarase o Día das Letras Galegas, que nesta ocasión se dedica ao poeta valdeorrés Florencio Delgado Gurriarán. Como cada ano o Concello organiza en torno a esta data unha ampla programación municipal dirixida a todos os públicos.
O primeiro dos eventos será o domingo 15 de maio. A música e o baile tradicionais galegos serán os protagonistas das actuacións que ofrecerán as asociacións culturais Santa María de Torás, Queiroga de Paiosaco e Arume de Caión na praza Olonne sur Mer da Laracha a partir das 18:00 horas.
Nese mesmo lugar, o día seguinte (luns 16) ás 22:00 horas comezará o concerto de Sheila Patricia, artista emerxente que é considerada pola crítica musical como unha das voces de referencia da nova canción de autora en Galicia. A Laracha é o lugar escollido para presentar por primeira vez en concerto o seu novo disco Orixe. Nel fusiona tradición e modernidade a través de ritmos e sons de todo o mundo. Este álbum inclúe dous temas con protagonismo para o noso municipio como son Canto de Caión e Maneo de Caión.
Para público infantil
Os espectáculos para o público infantil e familiar tamén terán unha presenza destacada na programación en torno ao Día das Letras Galegas. Haberá propostas culturais nas tres vilas, todas elas a partir das 18:00 horas e con entrada libre e gratuíta.
- A primeira será o luns 16 na Casa da Cultura da Laracha co espectáculo Brincadeiras da lingua, de Migallas Teatro.
- O mércores 18 a biblioteca de Paiosaco acollerá o contacontos Rosa Caramelo e outras historias a cargo de Talía Teatro.
- O programa pecharase o xoves 19 no centro sociocomunitario de Caión co artista Magín Blanco e o seu contacontos musical O que levamos nas maletas.
Concurso de marcapáxinas
Ademais, ata o 18 de maio estará aberto o prazo para participar na segunda edición do concurso de marcapáxinas. Está dirixido ao alumnado de educación primaria -nenos de idades comprendidas entre os seis e os doce anos-. Para máis información picar nesta ligazón.
